ജില്ലാ കോടതിയിലെ നോട്ടറി ഓഫീസർ

പലവിധ ആവശ്യങ്ങൾക്കും മുമ്പ് ഒരുപാട് തവണ ആ പ്രദേശം സന്ദർശിച്ചിട്ടുണ്ടങ്കിലും കോടതിയിൽ ഇതുവരെ പോയിട്ടില്ല. കൃത്യമായി വഴി അറിയാതെ ബസ്സിൽ നിന്നിറങ്ങി, ഗൂഗിൾ മാപ്പിന്റെ സഹായത്താൽ കോടതി കെട്ടിടത്തിന് മുമ്പിലെത്തിയപ്പോൾ ഗേറ്റ് അടച്ചിട്ടിരിക്കുന്നു. കോവിഡ് മുൻകരുതലുകളുടെ ഭാഗമായി സർക്കാർ ഓഫീസുകളിലെ വഴികൾ അടച്ചിടുന്നതും, ഒരു വഴി മാത്രം തുറന്ന് വെക്കുന്നതും സ്വാഭാവികമായതിനാൽ മറ്റേതെങ്കിലും വഴി കെട്ടിടത്തിനുള്ളിലേക്ക് കയറാമെന്ന് കരുതി. ആ ശ്രമങ്ങൾ വിഫലമായപ്പോഴാണ് അത് വഴി വന്ന പാട്രിക്കിനെ (陳致萌) കാണുന്നത്. ഒരു മുൻ പരിചയവുമില്ലാത്ത അവൻ കാര്യം കേട്ടയുടൻ, എന്നെ കാറിൽ കയറ്റി 10 മിനുട്ട് ദൂരം സഞ്ചരിച്ച്, പുതിയ കോടതി കെട്ടിടത്തിലെത്തിച്ചു. സുരക്ഷാ ഉദ്യോഗസ്ഥരുടെ പരിശോധനയും, കോടതിയിൽ അടക്കാനുള്ള ഫീസും നൽകി ബില്ല് വാങ്ങിയതിന് ശേഷമാണ് നോട്ടറി ഓഫിസറെ കാണുന്നത്.

‘മൂ-ഷിൻ, നിങ്ങളുടെ ARC (Resident certificate)-യും, യൂണിവേഴ്സിറ്റി സർട്ടിഫിക്കറ്റുകളും തരൂ..’

ഒറിജിനൽ യൂണിവേഴ്സിറ്റി സർട്ടിഫിക്കറ്റുകൾ ആദ്യം ജില്ലാ കോടതിയിലും, ശേഷം തായ്‌വാൻ വിദേശകാര്യ മന്ത്രാലയം, ഇന്ത്യ-തായ്‌പേയ് അസോസിയേഷൻ (ഇന്ത്യൻ എംബസി) എന്നിവിടങ്ങളിൽ നിന്നും അറ്റെസ്റ്റ് ചെയ്യണം. അതിന്റെ ആദ്യപടിയാണ് ഈ ഓഫീസറെ കാണുന്നത്. മാസ്ക് മാറ്റി, എന്റെ മുഖം കാണിച്ച് ഉറപ്പു വരുത്തുന്നതിനിടയിൽ ഓഫീസർ വീണ്ടും ചോദിച്ചു;

‘നിങ്ങളുടെ യൂണിവേഴ്സിറ്റിയിൽ പോയി, കാര്യങ്ങൾ അന്വേഷിച്ചതിന് ശേഷമാണ് ഞങ്ങൾ സർട്ടിഫിക്കറ്റുകൾ തിരിച്ച് നൽകുക. സാധാരണ അറ്റസ്റ്റേഷൻ നടപടി ക്രമങ്ങൾക്ക് ഒന്ന്-രണ്ട് ദിവസമെടുക്കും. നിങ്ങൾക്ക് എന്തെങ്കിലും അത്യാവശ്യമുണ്ടോ?’

‘ഞാൻ കോഴ്സ് പൂർത്തിയാക്കി. പെട്ടെന്ന് തിരിച്ച് നാട്ടിൽ പോകണമെന്നുണ്ട്. പെട്ടെന്ന് കാര്യങ്ങൾ തീർത്ത് തന്നാൽ നന്നായിരുന്നു’

കുറച്ച് നേരത്തെ ആലോചനക്ക് ശേഷം;

‘ശെരി.. എങ്കിൽ നിങ്ങൾ എന്റെ ഓഫീസിലേക്ക് വരൂ.. അവിടെ കമ്പ്യൂട്ടറിൽ നിങ്ങളുടെ യൂണിവേഴ്സിറ്റി അക്കൗണ്ട് തുറന്ന്, അതിലെ വിവരങ്ങൾ നോക്കി, ഞാൻ അറ്റെസ്റ്റ് ചെയ്ത് തരാം’

സാധാരണ, വിദ്യാർത്ഥികൾ പഠനം പൂർത്തിയാക്കിയാൽ യൂണിവേഴ്സിറ്റി പെട്ടെന്ന് തന്നെ അവരുടെ അക്കൗണ്ടുകൾ വെബ്സൈറ്റിൽ നിന്നും നീക്കം ചെയ്യും. അതറിയാതെ ഞങ്ങൾ രണ്ടുപേരും അത് തുറക്കാൻ ശ്രമിച്ചെങ്കിലും, കാര്യം സാധിച്ചില്ല. അതിനിടയിൽ ഒന്ന് ചിരിച്ചു കൊണ്ട് ഓഫീസർ;

‘മൂ-ഷിൻ, നിങ്ങളുടെ അക്കൗണ്ട് ഒഴിവാക്കിയതായി എഴുതി കാണിക്കുന്നു. നിങ്ങൾ കുറച്ച് നേരം പുറത്തിരിക്കൂ.. ഞാൻ നിങ്ങളുടെ യൂണിവേഴ്സിറ്റിയിൽ വിളിച്ച് കാര്യങ്ങൾ അന്വേഷിച്ചതിന് ശേഷം ഒപ്പിട്ട് നൽകാം.’

പുറത്തിരിക്കുന്നതിനിടയിൽ ചില ഫോൺ ശബ്ദങ്ങളും സീലുകൾ അടിക്കുന്നതിന്റെ ഒച്ചയുമൊക്കെ കേൾക്കുന്നുണ്ടായിരുന്നു. പത്ത് മിനുട്ടിന് ശേഷം അദ്ദേഹം പുറത്തേക്ക് വന്ന് സർട്ടിഫിക്കറ്റുകൾ തിരിച്ച് നൽകി.

‘എല്ലാം കൃത്യമായി തിരിച്ച് കിട്ടിയില്ലേ എന്ന് ഉറപ്പ് വരുത്തൂ.. കൂടെ ഈ കവറുകൂടി വെച്ചോളൂ.. കോടതിയുടേയും, ഇവിടുത്തെ അഡ്രസ്സും ഫോൺ നമ്പറുമെല്ലാം ഇതിലുണ്ട്. നിങ്ങളുടെ സർട്ടിഫിക്കറ്റിന്റെ പുറകിലും, മാർക്ക് ലിസ്റ്റിന്റെ മുമ്പിലുമാണ് ഞാൻ സീല് വെച്ചിട്ടുള്ളത്. കുഴപ്പമൊന്നുമില്ലല്ലോ?..’

അദ്ദേഹത്തിന് ചിരിച്ച് കൊണ്ട് നന്ദി പറഞ്ഞു, ജില്ലാ കോടതിയുടെ പുറത്തിറങ്ങി, എന്റെ ഹോസ്റ്റൽ മുറിയിലേക്ക് തിരിച്ച് നടക്കാൻ തുടങ്ങി. അന്തരീക്ഷത്തിൽ മാറുന്ന കാലാവസ്ഥയിൽ ചില മഴത്തുള്ളികൾ മുഖത്ത് പതിക്കുന്നതിനിടയിൽ നമ്മുടെ നാട്ടിൽ തൊട്ടപ്പുറത്തുള്ള മകന്റെ വീട്ടിലേക്ക് പോയ വൃദ്ധക്ക് ഫൈനടിച്ച് നൽകിയ സെക്ടറൽ മജിസ്‌ട്രേറ്റിനെ ഒരു നിമിഷം വിസ്മരിച്ച് പോയി.!!

‘Bye Bye’Longgang Mosque

Longgang mosque witnessed my most of the emotions in the last few years. It was a great place to meet many nationals across the world and interact with them even if they don’t have much knowledge in English. I have experienced their love, affection and kindness without the border and race. I really thank my dear friends; Hasan Wang, Abg Ipin, Ahmed El Maamoun, Mustafa Agarli and Kawsu Bah. Their friendship and care were special here as compared to others. The Chief Imam, the Chairman of Mosque committee Mr. Ali Sahib and other members consider me as one of them and have participated on many occasions together.

I have written their life story & 50 years history of Longgang mosque which were published in Chandrika newspaper twice. The committee members and the people of Zhongli really loved it. They also gave me good attention every time. Junior imam Mr. Ali, a friendly elder brother, always contacted me for giving lectures or interviews for junior high school and college students. The students came to the mosque and they are interested in reporting Islamic life, religious differences and details of worship for their project works. I have enjoyed their interviews and explained well about the culture & spiritual values of Islamic life based on my little knowledge.

Yesterday, it was a Jumua prayer after a few months due to pandemic issues. I met the people and committee members again. They gave me a good farewell with lunch and overwhelmed their love once again. They told me to stay here or come back again after a while and join them. I can observe their gloomy faces this time. Thank you very much for everything!

Over all, I really enjoyed my life in both Ramdan and non ramadan days in Longgang mosque with Zhongli muslim community.

Jazakallah Khair & Ma’assalam ❤

ഒരു ഡോക്ടറേറ്റ് കഥ

ജീവിതത്തിൽ ഏറെ സന്തോഷം നിറഞ്ഞൊരു ദിനങ്ങളാണിത്. കഴിഞ്ഞ നാലര വർഷത്തെ പ്രയത്ന ഫലമായി തായ്‌വാനിലെ ചങ് യാൻ ക്രിസ്ത്യൻ യൂണിവേഴ്സിറ്റിയിലെ ബയോസയൻസ് ടെക്നോളജി ഡിപ്പാർട്മെന്റിൽ നിന്നും ഡോക്ടറേറ്റ് ലഭിച്ച വിവരം സന്തോഷത്തോടെ പങ്കുവെക്കുന്നു. ചിക്കുൻഗുനിയക്കെതിരെ പ്രയോഗിക്കാവുന്ന പുതിയൊരു മോണോക്ലോണൽ ആന്റിബോഡിയുടെ കണ്ടെത്തലും, ബൈകാലിൻ, ബൈകലെയ്‌ൻ എന്നീ സംയുക്തങ്ങളുടെ ഔഷധസാധ്യതകളെക്കുറിച്ചും, ബാക്കുലോ വൈറസിലൂടെ വിവിധ വൈറസുകൾക്കെതിരെ മരുന്നുകൾ കണ്ടെത്താനുള്ള നൂതന രീതിയെക്കുറിച്ചുമുള്ള പഠനമാണ് എന്റെ ഗവേഷണ പ്രബന്ധത്തിന്റെ സംഗ്രഹം.

അമിത സാഹസികതയോ, വലിയ ബുദ്ധിമുട്ടുകളോ ഇല്ലാതെ തന്നെ പി.എച്ച്.ഡി ഡിഗ്രി ലഭിച്ചതിൽ ആദ്യം സൃഷ്ടാവിനോട് നന്ദി പറയുന്നു. ഈ നിമിഷത്തിൽ ഒരുപാട് കാര്യങ്ങൾ മനസ്സിലേക്ക് കയറി വരുന്നുണ്ട്. നരിവാലമുണ്ടയിലെ കുഞ്ഞാണിയിൽ നിന്നും ഡോ. മുഹ്‌സിനിലേക്കുള്ള ഒരു പതിറ്റാണ്ടിന്റെ പഠനയാത്രയിൽ പരിചയപ്പെട്ട വിവിധ മുഖങ്ങൾ, സ്ഥലങ്ങൾ, സമ്മിശ്ര സന്തോഷ-സന്ദാപ അനുഭവങ്ങളുമെല്ലാം അതിൽ പെടുന്നു. പാലേമാട് സ്കൂളിൽ നിന്നും തരക്കേടില്ലാത്ത മാർക്ക് ലഭിച്ചാണ് പത്താം തരം വിജയിച്ചത്. ശേഷം, അതേ സ്കൂളിൽ മലയാളം മീഡിയത്തിൽ നിന്നും ഹയർ സെക്കണ്ടറിയിലെത്തിയപ്പോൾ ഞാനും ഫസലുമൊന്നും (Fazal) ചില വിഷയങ്ങളിൽ ജയിക്കാറ് പോലുമില്ല. എങ്കിലും, ദൈവാനുഗ്രഹത്താൽ തോൽവിയറിയാതെ ഹയർസെക്കണ്ടറി കടന്നു. വലിയ പ്രതീക്ഷകളൊന്നുമില്ലാഞ്ഞിട്ടും, തൃശൂരിലെ ചൈതന്യ ക്ലാസ്സസ്സിൽ ഒരു കൊല്ലം എൻട്രൻസ് കോച്ചിങ്ങിന് പോയി. ‘ചക്കയിടുമ്പോൾ മുയലിനെ കിട്ടിയാലോ’ എന്ന പ്രതീക്ഷയിലായിരുന്നെങ്കിലും, കഴിയും വിധം ശ്രമിച്ചതിനാൽ, എന്നെ പോലൊരു സാധാരണ വിദ്യാർത്ഥിക്ക് കിട്ടാവുന്ന നല്ലൊരു റാങ്കും കിട്ടി. പക്ഷെ, ആ റാങ്കുകൊണ്ട് ഞാൻ ആഗ്രഹിച്ചത് എനിക്ക് പഠിക്കാൻ കഴിയുമായിരുന്നില്ല. എങ്കിലും, ജീവിതത്തിൽ ഒരുപാട് കാര്യങ്ങളിൽ ആ ഒരു വർഷത്തെ പഠനവും, രീതികളുമെല്ലാം ഏറെ സ്വാധീനിച്ചിട്ടുണ്ടെന്നതിൽ തർക്കമില്ല. അതേ നേരം, ഒറീസയിലെ കലിംഗ യൂണിവേഴ്സിറ്റിയിലെ (KIIT) ‘അഡ്മിഷൻ ലെറ്റർ’ സമയം തെറ്റി വന്നതിനാൽ അവിടെയും കയറാൻ കഴിഞ്ഞില്ല. പിന്നീടാണ് തിരുച്ചിറപ്പള്ളി ഭാരതീദാസൻ യൂണിവേഴ്സിറ്റിയിൽ എം. ടെക് ബയോ ടെക്നോളജി ഇന്റഗ്രേറ്റഡ് (6 years) കോഴ്സിന്റെ വിവരങ്ങൾ അറിയുന്നത്. അവസാനത്തെ അവസരം എന്നതിലുപരി, ആപ്ലിക്കേഷൻ നൽകാനുള്ള അവസാന ദിവസങ്ങളിലാണ് യൂണിവേഴ്സിറ്റി വെബ്സൈറ്റിൽ നിന്നും ഫോം എടുത്ത് തിരുച്ചിയിലേക്ക് അയക്കുന്നത്. അടുത്ത ആഴ്ച്ച എൻട്രൻസ് പരീക്ഷയിലും പങ്കെടുത്തു. രണ്ട് ദിവസത്തിനു ശേഷം 34 സീറ്റുകളുള്ള കോഴ്‌സിലേക്ക് 46-മത്തെ റാങ്ക് കിട്ടിയതായി അറിഞ്ഞു. അവസാനത്തെ കച്ചിത്തുരുമ്പും കൈവിട്ടു പോകുമോ എന്ന ഭയത്തിലിരിക്കുമ്പോഴാണ് യൂണിവേഴ്സിറ്റിയിലെ സെറ്റിൽ (SET- School of Engineering & Technology) നിന്നും ഇന്റർവ്യൂവിൽ പങ്കെടുക്കണമെന്ന് പറഞ്ഞു ഫോൺ വരുന്നത്. അങ്ങനെ ഓരോ വർഷവും ഇതര സംസ്ഥാനങ്ങളിൽ നിന്നുള്ള വിദ്യാർത്ഥികൾക്ക് (Other state quota) നൽകുന്ന അഞ്ചു സീറ്റുകളിൽ ഒന്നിൽ അഡ്മിഷൻ ലഭിച്ചു. ഒരു തമിഴ്‌നാട് സർക്കാർ യൂണിവേഴ്സിറ്റിയായിരുന്നിട്ട് പോലും ഞാനല്ലാതെ വേറെ മലയാളികൾ ആരും തന്നെ ഈ കോഴ്‌സിലേക്ക് അപ്പോൾ അപേക്ഷിച്ചിരുന്നില്ലെന്നതും ഈ അവസരത്തിൽ ഓർത്തു പോകുന്നു.

ആറു വർഷത്തെ തിരുച്ചിയിലെ വാസം വ്യക്തി ജീവിതത്തിലും, പഠനത്തിലും, ഭാഷയിലും, കാഴ്ചപ്പാടുകളിലുമെല്ലാം വ്യക്തമായി സ്വാധീനിച്ചു. ക്‌ളാസ്സിലെ തമിഴനല്ലാത്ത ഏക വിദ്യാർത്ഥിയായിരുന്നു ഞാൻ. ഒരുപാട് കാര്യങ്ങളിൽ അത് എനിക്ക് ഗുണം ചെയ്യുന്നതിലുപരിയായി, മറ്റുള്ളവർ എന്നെ കൂടുതൽ പരിഗണിച്ചു എന്ന് പറയുന്നതാണുത്തമം. ഈ കാലയളവിൽ എഴുത്തും വായനയുമടക്കം തമിഴ് ഭാഷ നന്നായി സ്വായത്തമാക്കി. നമ്മുടെ രാജ്യത്തിന്റെ വിവിധ പ്രദേശങ്ങളിൽ നിന്നുമുള്ള വിദ്യാർത്ഥികളുമായി ഇടപഴകാനും അവരുടെ സംസ്കാരങ്ങൾ മനസ്സിലാക്കാനും കഴിഞ്ഞതിൽ യൂണിവേഴ്സിറ്റി കാമ്പസിന് നന്ദി പറയേണ്ടതുണ്ട്. ജീവിതത്തിൽ ഏറ്റവും മാന്യനായ നിരീശ്വര വാദിയെ പരിചയപ്പെട്ടതും ഇവിടെ തന്നെയാണ്. ആന്ധ്രാപ്രദേശിൽ ജനിച്ച് മലയാളവും തമിഴും സംസാരിക്കുന്ന ഹിസ്റ്ററി ഡിപ്പാർട്മെന്റിലെ അദ്ധ്യാപകൻ ഡോ. ശ്രീനിവാസ റാവു സാർ (Srinivasa Rao Yenda). ചില സായാഹ്നങ്ങളിൽ അദ്ദേഹം നമസ്കാരത്തിന് വേണ്ടി എന്നെ പള്ളിയിൽ കൊണ്ട് വിടാറുള്ളത് ജീവിതത്തിൽ മറക്കാൻ കഴിയില്ല. എന്നാൽ ഒരിക്കൽ പോലും മതങ്ങളെ കുറിച്ച് തന്നോട് തർക്കിക്കാനോ, മത കാര്യങ്ങളിൽ ഇടപെടാനോ അദ്ദേഹം ശ്രമിച്ചിട്ടില്ല. മാത്രമല്ല, ഓരോ സായാഹ്നങ്ങളിലും അനിലേട്ടന്റേയും, (Dr. Anil Kumar) റാവു സാറിന്റേയും കൂടെ സംസാരിച്ചിരിക്കുന്നതും, സാറിന്റെ ആഗ്രഹാനുസരണം നാടൻ തട്ടുകടയിൽ പോയി ബീഫ് ബിരിയാണി കഴിക്കുന്നതും, യൂണിവേഴ്സിറ്റിയുടെ മുമ്പിലുള്ള ഖദീജ പള്ളിയിലെ സ്പെഷ്യൽ ഇഫ്താറിൽ ഒരുമിച്ച് പങ്കെടുക്കുന്നതുമെല്ലാം തിരുച്ചി ഓർമ്മകളിൽ മികച്ചതാണ്.

ഭാരതിദാസൻ യൂണിവേഴ്സിറ്റിയിൽ ചേർന്ന ഉടനെയാണ് പിതാവ് രണ്ട് പതിറ്റാണ്ട് നീണ്ടു നിന്ന പ്രവാസ ജീവിതം അവസാനിപ്പിച്ച് നാട്ടിലെത്തിയത്. തന്റെ ജീവിതത്തിൽ ആകെ സമ്പാദിച്ച വീട്ടിൽ മക്കളോടൊപ്പം ഇനിയുള്ള കാലം കഴിയാനുള്ള മോഹം കൊണ്ടാണ് നാട്ടിലെത്തിയതെങ്കിലും, പല കാര്യങ്ങളും ചെയ്തു നോക്കിയിട്ടും നാട്ടിൽ ഒന്നും വിജയിക്കാനായില്ല. ഓരോ സമയത്തും സാമ്പത്തികമായ കണക്കു കൂട്ടലുകൾ പിഴച്ചപ്പോഴും, കടുത്ത ബുദ്ധിമുട്ടുകളുണ്ടായപ്പോഴുമെല്ലാം പ്രിയ പിതാവ് എനിക്കും അനിയന്മാർക്കും വിദ്യാഭ്യാസം മുടക്കാൻ കൂട്ടാക്കിയില്ല. ഈ അവസരത്തിൽ ഉപ്പയെ ഒരുപാട് സഹായിച്ച സുനു ചേട്ടനെ (Sunil Kalai) പോലുള്ളവരെ എടുത്തു പറയേണ്ടതുണ്ട്. ശെരിക്കും, വീട്ടിൽ നിന്നും തിരുച്ചിയിലേക്കും, തിരിച്ചും യാത്ര ചെയ്യാൻ തന്നെ ബുദ്ധിമുട്ടിയിരുന്നൊരു കാലം. അതിനാൽ തന്നെ നീണ്ട ഇടവേളകളിലല്ലാതെ നാട്ടിലോ വീട്ടിലോ അധികം പോവാറുണ്ടായിരുന്നില്ല.

ആറു വർഷത്തെ പഠന കാലയളവിൽ മൂന്ന് പ്രൊജെക്ടുകളും, ഒരു സമ്മർ റിസർച്ച് ഫെൽലോഷിപ്പും ചെയ്യാൻ സാധിച്ചു. ആദ്യത്തിൽ അരുൾ ആനന്ദിന്റെ (Dr. Arul Ananth) കൂടെ എലിയിലായിരുന്നു തുടക്കം. ശേഷം, മഹാത്മാ ഗാന്ധി ടോറൻ ക്യാമ്പ് സെന്ററിൽ (BDU-MGDC) മുരുഗണ്ണനോടൊപ്പം (Dr. Muruga Das) ഹൈഡ്രയിലും ഒന്ന് പയറ്റി നോക്കി. അത് പിന്നീട് ബംഗാളി സ്വദേശി ജീഷാൻ ഭായിയുടെ കൂടെ (Dr. Mohammed Zeeshan) ഇന്റർനാഷണൽ ജേർണലിൽ പ്രസിദ്ധീകരിച്ചു. ഒപ്പം, പ്രിയ സുഹൃത്ത് ബാലാജിയിൽ (Dr. Bala Gi ) നിന്ന് സെൽ കൾച്ചറിന്റെ (Cell Culture) ബാലപാഠങ്ങൾ പഠിക്കാൻ ശ്രമിച്ചു. ഇതിനിടയിലാണ് ഇന്ത്യൻ അക്കാദമി ഓഫ് സയൻസിന്റെ (IAS-SRFP) സമ്മർ റിസർച്ച് ഫെലോഷിപ്പിന് അപേക്ഷിച്ചത്. വാഴയുടെ വാഴപ്പിണ്ടിയിലുള്ള പ്രമേഹ ഗുണങ്ങളെക്കുറിച്ച് എലിയിൽ പഠനം നടത്തിയാൽ നല്ലതാണെന്ന രീതിയിൽ Google Scholar-ൽ കയറി കുറച്ചു പ്രബന്ധങ്ങൾ വായിച്ചുണ്ടാക്കിയതായിരുന്നു IAS Abstract. അങ്ങനെ, ആദ്യമായി ഫെലോഷിപ്പിന് അപേക്ഷിച്ചപ്പോൾ തന്നെ ഭാഗ്യം തുണച്ചു. രണ്ടു മാസം മദ്രാസ് ഡയബറ്റിക് റിസർച്ച് ഫൗണ്ടേഷനിൽ (MDRF- Chennai) ഇന്റേൺഷിപ്പിനും കയറി. ഡൽഹിയിലെ ഇൻസ്റ്റിറ്റ്യൂട്ട് ഓഫ് ജീനോമിക്‌സ് ആൻഡ് ഇന്റഗ്രേറ്റീവ് ബയോളജിയിൽ (CSIR-IGIB) സീബ്രാഫിഷിലായിരുന്നു (Zebrafish) എം.ടെക്-ന്റെ അവസാന വർഷ പ്രോജെക്ട്. IGIB-യിലാണെങ്കിൽ ഒരു മിനി തമിഴ്‌നാട് പോലെയായിരുന്നു. എല്ലാ ലാബിലും രണ്ട്-മൂന്ന് തമിഴ് മക്കളെ കാണാൻ കഴിയും. അതിനാൽ അവിടെയും മുമ്പ് പഠിച്ചെടുത്ത ഭാഷ ഉപകാരപ്പെട്ടു. ആറു മാസത്തെ ഡൽഹി ജീവിതത്തിൽ ഏറെ മറക്കാനാവാത്തൊരു മുഖമാണ് ആലപ്പുഴക്കാരൻ അബ്ദുൽ റസാഖിന്റെത് (Abdul Razak S). സ്ട്രക്ച്ചറൽ എൻജിനീയറായ അവനും എന്നെ പോലെ തന്നെ പ്രോജെക്ട് ചെയ്യാൻ വന്നതായിരുന്നു. ഭാഷയും വഴിയുമറിയാതെ ഞങ്ങൾ ഡൽഹിയിൽ ഒരുപാട് കറങ്ങിയിട്ടുണ്ട്.

പഠനത്തിന് ശേഷം പി.എച്ച്.ഡി പ്രവേശനത്തിന് വിവിധ രാജ്യങ്ങളിൽ അപേക്ഷിച്ചു. ഒരുപാട് പ്രൊഫസ്സർമാർക്ക് ഇ-മെയിലുകൾ അയച്ചെങ്കിലും സന്തോഷിക്കാനുള്ള മറുപടികളൊന്നും വന്നില്ല. കുടുംബത്തിന്റെ സാമ്പത്തിക ഭദ്രത നോക്കിയപ്പോൾ GRE, TOEFL, IELTS പോലുള്ള പരീക്ഷകളെഴുതാൻ ബുദ്ധിമുട്ടായിരുന്നെങ്കിലും, അവയുടെ കോച്ചിങ്ങിന് വേണ്ടി ഇനിയും കുറച്ച് മാസങ്ങൾ കൂടി ചിലവൊഴിക്കാൻ മാനസികമായി താൽപര്യമില്ലായിരുന്നു. അങ്ങനെ ഈ പരീക്ഷകളൊന്നും എഴുതാതെ തന്നെ സ്കോളർഷിപ്പ് കിട്ടുന്ന രാജ്യങ്ങളിൽ പി.എച്ച്.ഡി അഡ്മിഷന് ശ്രമിച്ചു. അവസാന വർഷ പ്രൊജക്റ്റ് സീബ്രഫിഷിൽ ചെയ്തതിനാൽ കൂടുതലും ആ രീതിയിലുള്ള ഗവേഷണ ലാബുകളാണ് നോട്ടമിട്ടത്. ഒരു മാസത്തെ അശാന്ത പരിശ്രമത്തിനൊടുവിൽ ചങ് യാൻ ക്രിസ്ത്യൻ യൂണിവേഴ്സിറ്റിയിലെ ബയോസയൻസ് ഡിപ്പാർട്മെന്റിലെ ഒരു പ്രൊഫെസ്സർ എന്നെ അദ്ദേഹത്തിന്റെ സീബ്രഫിഷ് ലാബിലേക്ക് ക്ഷണിച്ചു. പക്ഷെ, അപ്പോഴേക്കും ആ സെമെസ്റ്ററിലേക്കുള്ള യൂണിവേഴ്സിറ്റി അഡ്മിഷൻ അവസാനിച്ചിരുന്നു. എങ്കിലും, അടുത്ത ആറു മാസം കാത്തിരിക്കുന്നതിനിടയിൽ പ്രൊഫെസ്സർ ചില റിവ്യൂ പേപ്പറുകളെഴുതാനുള്ള പണികൾ തന്നു. ഇന്ത്യയിലെ വിവിധ സ്ഥാപനങ്ങളിലുള്ള സീബ്രഫിഷ് ലാബുകളെക്കുറിച്ചും അവരുടെ ഗവേഷണങ്ങളെക്കുറിച്ചുമെല്ലാം ആധികാരികമായി എഴുതാൻ കഴിഞ്ഞു. പിന്നീട് അത് Zebrafish journal-ൽ പ്രസിദ്ധീകരിച്ചു. റിവ്യൂ പേപ്പർ രചയിതാവ് എന്നതിലുപരി കുറച്ച് പണം കൂടി കിട്ടിയപ്പോൾ അടുത്ത സെമെസ്റ്ററിൽ തായ്‌വാനിലെ യൂണിവേഴ്സിറ്റിയിലേക്ക് വിമാനം പിടിക്കാനുള്ള കാശുമായി. നമ്മുടെ നാട്ടിൽ നിന്നും കൂടുതൽ ആളുകൾ തായ്‌വാനിലേക്ക് വരാത്തത് കൊണ്ട് ആദ്യം വിസയെടുക്കുന്നതിനെക്കുറിച്ച് വളരെ ബുദ്ധിമുട്ടിയെങ്കിലും ചില തമിഴ് സുഹൃത്തുക്കളുടേയും, സൈഫുറഹ്‌മാന്റേയും സഹായത്താൽ അവ ഭംഗിയായി നടന്നു.

ചൈനീസ് ഭാഷ സംസാരിക്കുന്ന ജനാധിപത്യ സർക്കാറുള്ള ചെറിയൊരു ദ്വീപാണ് തായ്‌വാൻ. ഒട്ടുമിക്ക കാര്യങ്ങളിലും പാശ്ചാത്യ സംസ്കാരങ്ങളെ പിന്തുടരുന്നൊരു ജനത. യൂണിവേഴ്സിറ്റിയിൽ എത്തിയതിന് ശേഷം പഠനം, ഗവേഷണം, ഭാഷ, ജീവിത രീതി എന്നിവയിലുള്ള ഇവരുടെ മാറ്റങ്ങളെല്ലാം നന്നായി ആസ്വദിക്കാൻ കഴിഞ്ഞു. ഒട്ടുമിക്ക ഏഷ്യൻ രാജ്യങ്ങളിൽ നിന്നും സുഹൃത്തുക്കളെ കിട്ടി. ഭക്ഷണത്തിന് മാത്രമാണ് ഇവിടെ ചെറിയ ബുദ്ധിമുട്ടുണ്ടായത്. അത് ചില തമിഴ് സുഹൃത്തുക്കളുടെ സഹായത്താൽ ഹോസ്റ്റലിൽ സ്വയം പാചകം തുടങ്ങി. CYCU ഇന്റർനാഷണൽ സ്റ്റുഡന്റ് സ്കോളർഷിപ്പിൽ ഉൾപ്പെടുത്തി സൗജന്യ പഠന ചിലവുകളും ഹോസ്റ്റൽ സൗകര്യവും യൂണിവേഴ്സിറ്റിയിൽ നിന്നും ലഭിച്ചു. അതിലുപരി, മാസത്തിൽ തരക്കേടില്ലാത്തൊരു ഫെലോഷിപ്പും കയ്യിൽ കിട്ടാൻ തുടങ്ങി. രണ്ട് സെമെസ്റ്ററിൽ ചൈനീസ് ഭാഷ പഠിക്കുകയും, ചൈനീസ് TOCFL പരീക്ഷ നേടുകയും, ഒരു ചൈനീസ് ഷോർട്ഫിലിമിൽ വിവിധ രാജ്യക്കാരുടെ കൂടെ അഭിനയിക്കുകയും ചെയ്തു. ഇക്കാലയളവിൽ ഈ രാജ്യത്തിന്റെ വിവിധ കാര്യങ്ങളെക്കുറിച്ചും, ശാസ്ത്ര വിഷയങ്ങളെക്കുറിച്ചും, ഞാൻ നടത്തിയ യാത്രകളെക്കുറിച്ചുമെല്ലാം എഴുതിയ കുറിപ്പുകൾ മാധ്യമം, ചന്ദ്രിക, ദേശാഭിമാനി, സുപ്രഭാതം തുടങ്ങിയ പത്രങ്ങളിൽ പ്രസിദ്ധീകരിച്ചു. പ്രിയ ഷുക്കൂറിക്കയാണ് ഇവക്ക് വേണ്ട രീതിയിൽ നിർദേശങ്ങൾ നൽകിയത്. മലപ്പുറത്തിന്റെ ‘പച്ച’യായ രാഷ്ട്രീയത്തിൽ മാത്രം താൽപര്യമുള്ളതിനാൽ എം എസ് എഫ്-ന്റെ ഗവേഷക വിദ്യാർത്ഥി കൂട്ടായ്മയിൽ (IKRA-Initiative for Kerala Research Scholars’ Advancement) അംഗമാവാൻ സാധിച്ചു. രാഷ്ട്രീയത്തിലുപരി, ഇന്ത്യയുടെ അകത്തും പുറത്തും വിവിധ ഭാഷകൾ മുതൽ ശാസ്ത്ര വിഭാഗങ്ങളിലും, നിയമത്തിലുമെല്ലാം ഗവേഷണം നടത്തുന്നവരുമായി സൗഹൃദം പങ്കിടാനായി. വിവിധ ദിനപത്രങ്ങളിലും, വാരികകളിലുമെല്ലാം നിരന്തരം സാമൂഹിക-സാംസ്കാരിക-രാഷ്ട്രീയ-ശാസ്ത്ര വിഷയങ്ങളെക്കുറിച്ച് എഴുതുന്ന ഒരു കൂട്ടം യുവ പ്രതിഭകളെ ഇവിടെ നിന്നും പരിചയപ്പെട്ടത് ജീവിതത്തിലെ സൗഭാഗ്യമായി കരുതുന്നു.

യൂണിവേഴ്സിറ്റിയിൽ ചേർന്ന് ആറുമാസത്തിനു ശേഷം ലാബിലെ ചില പ്രശ്നങ്ങളാൽ സീബ്രഫിഷ് ഗവേഷണത്തിൽ നിന്നും മാറി, പ്രൊഫ. സോങ് യാൻ വുവിന്റെ (ഈ ചിത്രത്തിലുള്ളത്) മോളിക്യൂലാർ ബയോളജി ലാബിൽ കയറി. ക്ലോണിംഗ്, സെൽ കൾച്ചർ, ബാക്കുലോവൈറസ് പ്രൊഡക്ഷൻ പോലുള്ള പ്രക്രിയയിലൂടെ പ്രോട്ടീൻ നിർമ്മാണമായിരുന്നു ആദ്യ ജോലികൾ. അപ്പോഴേക്കും നാട്ടിൽ നിന്നും വന്ന് ഒന്നര വർഷം കഴിഞ്ഞു. സാമ്പത്തികമായി സ്വന്തം കാലിൽ നിൽക്കാനുള്ള പ്രാപ്തിയായപ്പോൾ തന്നെ വീട്ടിൽ കല്ല്യാണാലോചനകൾ തുടങ്ങി. അങ്ങനെ ഒരു മാസം നീണ്ട തിരച്ചിലുനൊടുവിൽ വീടിനടുത്തുള്ള പ്രദേശത്തെ ബി.എസ്.സി. വിദ്യാർത്ഥിനിയെ നിക്കാഹ് കഴിച്ച്, വീണ്ടും അവളുടെ പഠനവും എന്റെ ഗവേഷണവും തുടർന്നു. വീട്ടിൽ നിന്നും യൂണിവേഴ്സിറ്റിയിൽ തിരിച്ചെത്തി മാസങ്ങൾക്കുള്ളിലാണ് അവിചാരിതമായി നാട്ടിൽ നിന്നും ഖാലിദ് കാക്കാന്റെ ഫോൺ വിളി വരുന്നത്. പ്രത്യേകിച്ച് അസുഖങ്ങളൊന്നുമില്ലാതെ രാത്രി കിടന്നുറങ്ങാൻ നേരം ഉപ്പാക്ക് നെഞ്ച് വേദന വന്നുവെന്നും, ആശുപത്രിയിലെത്തി ഡ്രിപ്പ് നൽകുന്നതിനിടയിൽ പ്രിയ പിതാവ് ഞങ്ങളെ വിട്ടു പിരിഞ്ഞു. ഉദ്ദേശിച്ച സമയത്ത് വിമാന സർവ്വീസിന്റെ അഭാവത്താലും, കൂടുതൽ സമയം വൈകുന്നതിനാലും പ്രിയ പിതാവിനെ അവസാനമായി ഒരു നോക്ക് കാണാൻ കഴിയാത്തത് ഇന്നും നൊമ്പരമായി നിൽക്കുന്നു. ശേഷം, വീട്ടിലെ മൂത്ത മകനെന്ന നിലയിൽ ഉത്തരവാദിത്തങ്ങൾ കൂടി. അനിയന്റെയും ഭാര്യയുടേയും വിദ്യാഭ്യാസം, വീട്ടിലെ കാര്യങ്ങൾക്ക് പുറമെ പിതാവിന്റെ സാമ്പത്തിക ബാധ്യതകളുമെല്ലാം എന്റെ ഫെല്ലോഷിപ്പ് കൊണ്ട് നന്നായി പരിഹരിക്കാൻ കഴിഞ്ഞു.

പി.എച്ച്.ഡി കോഴ്സിൽ ഒരു ഇന്റർനാഷണൽ കോൺഫറൻസിൽ നിർബന്ധമായും പങ്കെടുക്കേണ്ടതുണ്ട്. യൂണിവേഴ്സിറ്റിയിൽ നിന്നും ട്രാവൽ ഗ്രാന്റ് കിട്ടുന്നതിനാൽ 2020 മാർച്ച് മാസത്തിൽ തിരുച്ചി വഴി മധുരൈയിലേക്ക് പുറപ്പെട്ടു. വാക്‌സിനുകൾ കണ്ടെത്താൻ റീ-കോമ്പിനന്റ് ബാക്കുലോ വൈറസിന്റെ ഉപയോഗങ്ങളെക്കുറിച്ച് കോൺഫറൻസിൽ പ്രബന്ധമവതരിപ്പിച്ചു. ഈ കോൺഫറൻസിൽ എന്റെ ഗവേഷണത്തിന് Dr. APJ Abdul Kalam Best Innovator അവാർഡും ക്യാഷ് പ്രൈസും നേടായനായത് ദൈവാനുഗ്രഹം. വീണ്ടും കുറച്ച് നാൾ കുടുംബത്തോടൊപ്പം കഴിയാനും നല്ല ഭക്ഷണം കഴിക്കാനുമുള്ള ആഗ്രഹത്താൽ നാട്ടിലേക്ക് തിരിച്ചു. പത്ത് ദിവസം കുടുംബത്തോടൊപ്പം താമസിച്ച് തായ്‌വാനിലേക്ക് തിരിക്കാനായിരുന്നു കരുതിയിരുന്നത്. അതിനിടയിൽ കോവിഡ് വ്യാപനം അധികരിക്കുകയും രാജ്യത്ത് ലോക്ഡൌൺ പ്രഖ്യാപിക്കുകയും ചെയ്തു. അങ്ങനെ, മാസങ്ങൾ വീട്ടിൽ കഴിയാനുള്ള ഭാഗ്യമുണ്ടായി. പക്ഷെ, പിന്നീട് നടന്നത് ജീവിതത്തിലൊരിക്കലും ഞാൻ ചിന്തിക്കാൻ ഇഷ്ട്ടപെടാത്തൊരു കാര്യമാണ്. അപ്രതീക്ഷിതമായി, മൂന്നു മാസത്തിനു ശേഷം എം.എസ്.സി. വിദ്യാർത്ഥിനിയായ ഭാര്യയുമായി വിവാഹ മോചനം നടന്നു (ഈ കാരണം കൊണ്ടാണ് കുടുംബ ജീവിതത്തെക്കുറിച്ച് ഒന്നും എഴുതാതിരുന്നത്. ഒരു അടഞ്ഞ അദ്ധ്യായമായതിനാൽ ഇതിന്റെ കാര്യവും കാരണവുമൊന്നും ഇനി ദുനിയാവിൽ സംസാരിക്കുന്നതിൽ പ്രസക്തിയില്ല. എല്ലാം ആഖിറത്തിലേക്ക് മാറ്റി വെക്കുന്നു. ഇൻശാ അല്ലാഹ്!). ഒരു അവസാന വർഷ ഗവേഷണ വിദ്യാർത്ഥി എന്നതിലുപരി, ജീവിതത്തിൽ പെട്ടെന്നുണ്ടായ ഈ സംഭവ വികാസങ്ങൾ വ്യക്തിപരമായി ഏറെ തളർത്തുന്നതും വലിയ വിഷമതകൾ നേരിട്ട സമയവുമായി. ഇക്കാലയളവിൽ അത്തീഖ്, സാജിദ്, ഇബ്രാഹിം, ഷമീം പോലുള്ള സുഹൃത്തുക്കൾ കൂടെ നിന്ന് നിരന്തരം സംസാരിക്കുകയും, വിഷമ ഘട്ടങ്ങൾ തരണം ചെയ്യാനും സഹായിച്ചു.

വിമാന സർവ്വീസുകൾ ഇല്ലാത്തതിനാൽ യൂണിവേഴ്സിറ്റിയിലേക്ക് തിരിച്ച് പോകാൻ കഴിയാത്ത അവസ്ഥയിൽ പി.എച്ച്.ഡി സ്വപ്നം വൃഥാവിലാകുമോ എന്ന ഭയവും, വ്യക്തി ജീവിതത്തിലെ നഷ്ടത്തിന്റെ സമ്മർദത്തിനിടയിലും നിൽക്കുമ്പോഴാണ് പ്രിയ സുഹൃത്ത് ഇബ്രാഹിമിന്റെ ഫോൺ വരുന്നത്. പെരിന്തൽമണ്ണ സുതാര്യ ഹെൽത് കെയർ & ഡയഗ്നോസ്റ്റിക്‌സിൽ കോവിഡ് ടെസ്റ്റിന് വേണ്ടി പുതിയ മോളിക്യൂലർ ബയോളജി ലാബ് നിർമ്മാണവും NABL (National Accreditation Board for Testing and Calibration Laboratories) അംഗീകാരം നേടിയെടുക്കലുമായിരുന്നു പുതിയ ദൗത്യം. നല്ലൊരു ശമ്പളവും അവൻ ഏർപ്പാടാക്കി തന്നു. നാല് ചുവരുകൾക്കുള്ളിലെ ഗവേഷണ ലാബിൽ നിന്നും വ്യത്യസ്തമായി ഒരുപാട് ആളുകളുമായും, കോവിഡ് ആന്റിജൻ ടെസ്റ്റിന് വരുന്ന രോഗികളുമായും ഇടപഴകാൻ ഈ കാലത്ത് സാധിച്ചു. ആന്റിജൻ ടെസ്റ്റിൽ കോവിഡ് പോസിറ്റീവ് വരുന്ന രോഗികൾക്ക് രഹസ്യമായി നിർദേശങ്ങൾ നൽകുകയും, കേരള സർക്കാരിന്റെ വെബ്സൈറ്റിൽ രോഗികളുടെ വിവരങ്ങൾ ചേർക്കുകയും, ടെസ്റ്റിന്റെ റിസൾട്ടുകൾ ഒപ്പിട്ട് കൊടുക്കുന്ന ജോലികളുമെല്ലാം നന്നായി ആസ്വദിക്കാൻ കഴിഞ്ഞു. അതിലുപരി, വ്യക്തി ജീവിതത്തിലെ സമ്മർദ്ദങ്ങളും വിഷമങ്ങളും അനുദിനം കുറഞ്ഞു തുടങ്ങി. അഞ്ചു മാസത്തെ സുതാര്യയിലെ ജോലി അവസാനിപ്പിച്ച് വീണ്ടും തായ്‌വാനിലേക്ക് വിമാനം കയറുമ്പോൾ, പണി കഴിഞ്ഞ മോളിക്യൂലർ ബയോളജി ലാബിൽ NABL അംഗീകാരത്തിന് വേണ്ടി വീഡിയോ കോൺഫറൻസിൽ പങ്കെടുക്കാൻ കഴിഞ്ഞതും, പുതിയൊരു ‘MolBio’ ടീമിന് ട്രെയിനിങ് നൽകി സജ്ജമാക്കിയതിലും ചാരിതാർഥ്യമുണ്ട്. ഇതിനിടയിൽ, ഇന്ത്യയിലെ ചിക്കുൻ ഗുനിയ വൈറസിൽ ഗവേഷണം നടത്തുന്ന ലാബുകളെക്കുറിച്ചും അവരുടെ ഗവേഷണ വിഷയങ്ങളെക്കുറിച്ചും വിശദമായൊരു റിവ്യൂ പേപ്പർ എഴുതാൻ സാധിച്ചു.

2020 ഡിസംബറിൽ, ലോക്ക്ഡൗണിൽ കുടുങ്ങി ഒൻപത് മാസത്തെ ഗൃഹവാസത്തിന് ശേഷം യൂണിവേഴ്സിറ്റിയിൽ തിരിച്ചെത്തി. പക്ഷെ, പ്രതീക്ഷിക്കാതെ മാസങ്ങൾ നാട്ടിലായതിനാൽ നാല് വർഷത്തെ സ്കോളർഷിപ്പ് ആറു മാസം കൂടി നീട്ടേണ്ടി വന്നു. ചൈനീസ് പരീക്ഷയും, Qualification exam-ഉം, കോഴ്സ് വർക്കുമെല്ലാം മുമ്പ് തന്നെ പൂർത്തിയാക്കിയിരുന്നു. അതിനാൽ, ഗവേഷണ പ്രബന്ധം തയ്യാറാക്കലും, ഗവേഷണ ലേഖനങ്ങൾ പ്രസിദ്ധീകരിക്കലുമാണ് ബാക്കിയുണ്ടായിരുന്നത്. പ്രിയ പ്രൊഫസറുടെ അകമഴിഞ്ഞ സഹായത്താൽ ഈ രണ്ടു കാര്യങ്ങൾക്കൂടി പൂർത്തീകരിച്ച്, യൂണിവേഴ്സിറ്റി കമ്മിറ്റിക്ക് മുമ്പിൽ ഗവേഷണ പ്രബന്ധം അവതരിപ്പിക്കാൻ സാധിച്ചു. ഈ സമയത്ത് പ്രിയ ഫൈസലിക്കാന്റെ നിർദേശങ്ങളും വളരെ സഹായകമായി. വ്യക്തമായ ഔഷധങ്ങളോ വാക്സിനുകളോയില്ലാത്ത ചിക്കുൻഗുനിയ വൈറസിനെതിരെ പ്രോട്ടീൻ ഉൽപ്പാദനവുമായി ബന്ധപ്പെട്ടതായിരുന്നു എന്റെ ഗവേഷണ വിഷയം. കുറച്ച് ദിവസങ്ങൾക്ക് മുമ്പ് പത്രങ്ങളിൽ ഇതിനെ കുറിച്ച് വിശദമായി വാർത്ത വന്നിരുന്നു. തായ്‌വാൻ സെന്റർ ഫോർ ഡിസീസ് കൺട്രോൾ ഇന്സ്ടിട്യൂട്ടിന്റെ സഹായത്താൽ ചികുൻഗുനിയക്കെതിരെ നാല് പുതിയ മോണോക്ലോണൽ ആന്റിബോഡികൾ നിർമ്മിച്ചെടുത്തെങ്കിലും, അതിൽ ഒന്നിന് മാത്രമാണ് കൂടുതൽ ഫലപ്രാപ്തി സെൽകൾച്ചറിലൂടെ രേഖപ്പെടുത്തിയത്. ശേഷം, ബൈകാലിൻ, ബൈകലെയ്‌ൻ തുടങ്ങിയ രണ്ട് ഔഷധഗുണങ്ങളുള്ള സസ്യസത്തുകൾ ഒരു പ്രത്യേക തരം ചൈനീസ് കുറ്റിച്ചെടിയിൽ നിന്നും സംസ്കരിച്ചെടുത്ത്, വൈറസിനെതിരെ അവയുടെ പ്രവർത്തനങ്ങൾ ബാക്കുലോ വൈറസ് എക്സ്പ്രെഷൻ വെക്ടർ സിസ്റ്റത്തിലൂടെ (BEVS ) പഠനത്തിന് വിധേയമാക്കി. അതിനിടയിൽ, ചിക്കുൻഗുനിയ വൈറസിന്റെ ജനിതകത്തിൽ Promoter sequence -കളിൽ ചില മാറ്റങ്ങൾ വരുത്തി പ്രോട്ടീൻ ഉൽപ്പാദനത്തിന്റെ സാധ്യതകളിലും ശ്രദ്ധ ചെലുത്തി. അങ്ങനെ, നാലര വർഷത്തെ സ്വപ്ന സാക്ഷാത്കാരമെന്നോണം ചങ് യാൻ ക്രിസ്ത്യൻ യൂണിവേഴ്സിറ്റിയിൽ നിന്നും ഡോക്ടറേറ്റ് ഏറ്റു വാങ്ങുമ്പോൾ വന്ദ്യ പിതാവിന്റെ അഭാവം മനസ്സിൽ ഏറെ പ്രകടമായിരുന്നു. പ്രിയ പിതാവ് കൂടെയുണ്ടായിരുന്നെങ്കിൽ എന്ന് ജീവിതത്തിലേറ്റവും കൂടുതൽ ഞാൻ ആഗ്രഹിച്ചൊരു നേരവും ഇത് തന്നെ.!

ജീവിതത്തിൽ ഒരാൾ പി.എച്ച്.ഡി നേടുന്നത് ഈ ലോകത്ത് അത്ര വലിയ കാര്യമൊന്നുമല്ല (എനിക്ക് കാര്യമാണെങ്കിലും!). മുമ്പ് പലതവണ വിവിധ വിഷയങ്ങൾ ഞാൻ ഇവിടെ എഴുതിയിട്ടുണ്ട്. അതുകൊണ്ട് തന്നെ ഈ കാര്യം കൂടി എന്റെ സുഹൃത്തുക്കളോട് പങ്കുവെച്ചു എന്ന് മാത്രം. നാം പ്രതീക്ഷിക്കാതെ പല പ്രശ്നങ്ങളും നമ്മുടെ ജീവിതത്തിലേക്ക് കടന്നു വരുമ്പോഴും, മറ്റുള്ളവർ വഞ്ചനയിലൂടെയോ ദ്രോഹങ്ങളിലൂടെയോ പരിഹാസത്തിലൂടെയോ മറ്റോ നമ്മെ തളർത്താൻ ശ്രമിച്ചെന്ന് വരാം. പക്ഷെ, ഓരോ തവണയും നമ്മൾ പ്രാർത്ഥിക്കുക, നന്നായി പ്രവർത്തിക്കുക, കൂടുതൽ പരിശ്രമിക്കുക. കൂടെ, അനാവശ്യമായ നെഗറ്റീവ് സംസാരങ്ങൾക്കൊന്നും ചെവി കൊടുക്കാതെ കൂടുതൽ നമ്മുടെ പ്രവർത്തനങ്ങളിൽ കർമ്മ നിരതരാവാൻ ശ്രമിക്കുക. ഒരുപാട് നാളത്തെ ക്ഷമക്കൊടുവിൽ ഒരിക്കൽ മനസ്സിലുള്ള ആഗ്രഹം നമ്മുടെ കയ്യിലെത്തുക തന്നെ ചെയ്യും. അതിലുപരി, മറ്റുള്ളവരെ നാം സഹായിച്ചില്ലെങ്കിലും ഒരിക്കലും ഉപദ്രവിക്കാതിരിക്കാൻ ശ്രദ്ധിക്കുക.

എന്നെ സ്നേഹിക്കുകയും സഹായിക്കുകയും, എനിക്ക് വേണ്ടി പ്രാർത്ഥിക്കുകയും ചെയ്ത ഒരുപാട് പേരെ ഇവിടെ എഴുതാൻ വിട്ടു പോയിട്ടുണ്ടെന്നറിയാം. എല്ലാവരോടും സ്നേഹം മാത്രം!

നന്ദി 🙂❤❤

– ഡോ. മുഹമ്മദ് മുഹ്‌സിൻ വരിക്കോടൻ

നരിവാലമുണ്ട, വഴിക്കടവ്

ബാക്‌ലോ വൈറസ് സിസ്റ്റത്തിലൂടെ ഒരു ഗവേഷണം

ഇന്റർനാഷണൽ ജേർണൽ ഓഫ് മോളിക്കുലാർ സയൻസിൽ ഞങ്ങളുടെ ലാബിലെ ഗവേഷണ ലേഖനം പ്രസിദ്ധീകരിച്ചു. മനുഷ്യനടക്കമുള്ള സസ്തനികളിലെ കോശങ്ങളിൽ ബാക്കുലോ വൈറസ് സിസ്റ്റത്തിലൂടെ വിവിധ വൈറസ് ബാധക്കെതിരെ മരുന്ന് കണ്ടു പിടിക്കാനുള്ള നൂതന രീതിയെക്കുറിക്കുറിച്ചും, ഈ രീതിയിൽ സസ്യ സ്രോതസ്സിൽ നിന്നും ചിക്കുൻ ഗുനിയ വൈറസിനെതിരെ ഉപായോഗിക്കാൻ പറ്റുന്ന ബൈക്കലിൻ സംയുക്തത്തിന്റെ കണ്ടെത്തലുമാണ് ഈ ലേഖനത്തിലുള്ളത്. എല്ലാ അപകടകാരികളായ വൈറസുകൾക്കെതിരെയും മരുന്നുകൾ കണ്ടെത്താൻ ഈ പുതിയ ബാക്മാം രീതി ഉപയോഗിക്കാവുന്നതാണ്. മുമ്പ് ഞങ്ങളുടെ ലാബിൽ ഷഡ്പദ കോശങ്ങളിൽ മാത്രം ഈ രീതി ഉപയോഗിച്ച് വൈറസുകൾക്കെതിരെ ഔഷധ ഗുണമുള്ള സംയുക്തങ്ങൾ കണ്ടെത്തിയെങ്കിൽ, ഇത്തവണ മനുഷ്യ കോശങ്ങളിലാണ് പരീക്ഷണങ്ങൾ നടത്തിയത്. എന്റെ ഗവേഷണ പ്രബന്ധത്തിന്റെ പ്രധാന ഭാഗം കൂടിയായ ഈ ലേഖനം സയൻസ് ഇതര വിദ്യാർത്ഥികൾക്കും, സാധാരണക്കാർക്കും വേണ്ടി കഴിയുന്ന രൂപത്തിൽ മലയാളത്തിൽ ഇവിടെ കുറിക്കുന്നു.

കൊതുകിലൂടെ മനുഷ്യരിലേക്ക് പകരുന്ന സൂക്ഷ്മാണുവാണ് ചിക്കുൻഗുനിയ വൈറസ്. അനന്തരഫലമായി കടുത്ത പനി, തലവേദന, ഛർദ്ദി, സന്ധി-പേശീ വേദന, കൈ-കാൽ മുട്ടുകളിൽ വീക്കം, ചർമ്മ വ്യത്യാസങ്ങൾ മുതൽ ചിലപ്പോൾ മരണം വരെ സംഭവിക്കുന്നു. ഒരാൾക്ക് വൈറസ് ബാധയേറ്റ് പനിയോ മറ്റോ വന്ന് സുഖപ്പെട്ടാലും ചില ശാരീരിക ബുദ്ധിമുട്ടുകൾ വീണ്ടും ഉണ്ടാവാറുണ്ടെന്ന് ഡോക്ടർമാർ പറയുന്നു. എന്നാൽ ഈ വൈറസ് ബാധക്ക് അലോപ്പതിയിലടക്കം വ്യക്തമായ മരുന്നുകൾ ലഭ്യമല്ല. ഓരോ രോഗിക്കും അവരുടെ പ്രായത്തിനും, രോഗ ലക്ഷണങ്ങൾക്കും അനുസരിച്ച് പനിയുടേയോ, ശരീര വേദനയുടെയോ ഔഷധങ്ങൾ നൽകി സുഖപ്പെടുത്താൻ ശ്രമിക്കുന്നു. ഈ അവസരത്തിലാണ് ചിക്കുൻഗുനിയ രോഗത്തിനെതിരെ ബാക്കുലോ വൈറസ് സിസ്റ്റത്തിലൂടെ ഒരു മരുന്ന് കണ്ടെത്താൻ ഞങ്ങളുടെ ലാബ് പരിശ്രമിച്ചത്.

ഓരോ തരം വൈറസിനും അവയുടെ ആക്രമണ ശേഷിക്കനുസരിച്ചും, മനുഷ്യരിലേക്കോ മറ്റു ജീവികളിലേക്കോ പകരുന്നതിന്റെ തോതനുസരിച്ചും ഗവേഷണ ലാബുകളിൽ വ്യത്യസ്ത തലങ്ങളിലാണ് കൈകാര്യം ചെയ്യുന്നത്. അതിനെ Biosafety Level എന്ന് പറയുന്നു. ചില സൂക്ഷ്മ ജീവികൾ വലിയ പ്രശ്നമുണ്ടാക്കാത്തവയാണ്. അതിനാൽ Biosafety Level 1-ൽ ഉൾപ്പെടുത്തി അവയെ ഭയപ്പാടുകളൊന്നുമില്ലാതെ ലാബുകളിൽ പഠനത്തിന് ഉപയോഗിക്കുന്നു. എന്നാൽ കോവിഡ്, എബോള പോലുള്ള വൈറസുകളെ ഗവേഷണാവശ്യങ്ങൾക്ക് ഉപയോഗിക്കുമ്പോൾ കൂടുതൽ സുരക്ഷാ മാനദണ്ഡങ്ങൾ പാലിക്കേണ്ടതുണ്ട്. അവ Biosafety Level ഉയർന്നവയിൽ പെടുന്നു. ഇങ്ങനെ Biosafety Level ഉയർന്ന തസ്തികയിൽ പെടുന്ന സൂക്ഷ്മ ജീവികളെ മനുഷ്യ ശരീരത്തിലേക്ക് ബാധിക്കാത്ത രൂപത്തിൽ സാധാരണ കൈകാര്യം ചെയ്യുന്നൊരു രീതിയാണ് ബാക്കുലോ വൈറസ് സിസ്റ്റത്തിലൂടെ സ്വീകരിക്കുന്നത്. ഒരു സൂക്ഷ്മ ജീവിയുടെ ജനിതകം മാത്രമെടുക്കുകയും, അവ ഒരു പ്രത്യേക തരം പ്രാണിയുടെ ജനിതകവുമായി കോർത്തിണക്കി, ഷഡ്പദങ്ങളുടെ കോശങ്ങളിൽ പരീക്ഷണങ്ങൾക്ക് വിധേയമാക്കുന്ന രീതിയാണ് ബാക്കുലോ വൈറസ് സിസ്റ്റത്തിലൂടെ അവലംബിക്കുന്നത്. ഈ രീതിയനുസരിച്ച് ഏത് വലിയ വൈറസായാലും വളരെ ലളിതമായ രീതിയിൽ, കൂടുതൽ മുൻ കരുതലുകളില്ലാതെ കൈകാര്യം ചെയ്യാവുന്നതാണ്. അവ ഷഡ്പദങ്ങളുടെ കോശങ്ങളിൽ മാത്രമേ ആക്രമിക്കുകയുള്ളൂ എന്നതും, മനുഷ്യരിലേക്ക് ഇവ പകരില്ല എന്നതും ഈ രീതി ഗവേഷകർ പിന്തുടരാൻ കാരണമാകുന്നു. എന്റെ ലാബിലെ ഒരു വിദ്യാർത്ഥി കോവിഡ് വൈറസിൽ ഇപ്പോൾ ഗവേഷണം നടത്തുന്നതും ഇതേ പ്രക്രിയയിലൂടെയാണ്.

ഇനി കാര്യത്തിലേക്ക് വരാം. ഞങ്ങൾ ആദ്യം ചിക്കുൻഗുനിയ വൈറസിന്റെ ജനിതകം ഉപയോഗിച്ച് ബാക്കുലോ വൈറസുകളെ ഉൽപ്പാദിപ്പിച്ചു. അവ ചിക്കുൻഗുനിയ വൈറസിന്റെ പ്രോട്ടീനുകൾക്ക് പുറമെ EGFP, DsRed എന്നീ പച്ചയും ചുവപ്പും മൈക്രോസ്കോപ്പിലൂടെ വീക്ഷിക്കാൻ കഴിയുന്ന പ്രോട്ടീനുകളും ഉൽപ്പാദിപ്പിച്ചു (ഇത് പറയാൻ കുറഞ്ഞ സമയം മതി, പക്ഷെ ഇത് നിർമ്മിച്ചെടുക്കാൻ ഒന്നൊന്നര വർഷമെടുത്തു!). ശേഷം, ഈ ബാക്കുലോ വൈറസിനെ ഷഡ്പദങ്ങളുടെ കോശങ്ങളിൽ പകരാൻ അനുവദിച്ചു. രണ്ട് മൂന്ന് ദിവസത്തിനുള്ളിൽ തന്നെ ഈ ബാക്കുലോ വൈറസുകൾ ഷഡ്പദങ്ങളുടെ കോശങ്ങളിൽ ആക്രമണം നടത്തി, മുകളിൽ പറഞ്ഞ മൂന്ന് പ്രോട്ടീനുകളും ഉണ്ടാക്കി. അവ വ്യത്യസ്ത നിറങ്ങളിൽ മൈക്രോസ്കോപ്പിലൂടെ കാണാം. അങ്ങനെ, ഒന്നൊന്നര വർഷത്തെ പ്രവർത്തന ഫലമായി ചിക്കുൻഗുനിയയുടെ ബാക്കുലോ വൈറസുകളെ കിട്ടി. ഇത്തരം സങ്കരയിനം വൈറസുകളെ ഒരുപാട് മാസങ്ങൾ നമുക്ക് ലാബിലെ ഫ്രിഡ്‌ജുകളിലും ഫ്രീസറുകളിലും സൂക്ഷിക്കാവുന്നതും, പിന്നീട് ആവശ്യാനുസരണം ഉപയോഗിക്കാവുന്നതുമാണ്.

ആദ്യ ഘട്ടത്തിൽ സങ്കരയിനം ബാക്കുലോ വൈറസ് നിർമ്മാണമാണെങ്കിൽ, രണ്ടാം ഘട്ടം അവയെ ഉപയോഗിച്ച് മരുന്നുകളുടെ പരീക്ഷണമാണ്. 2011-12 കാലഘട്ടത്തിൽ ഞങ്ങളുടെ ലാബിൽ വികസിപ്പിച്ചെടുത്ത ഒരു പ്രക്രിയയാണ് കോശ സമ്മിശ്ര പരിശോധന (സെൽ ഫ്യൂഷൻ അസ്സെ). അതായത് ഷഡ്പദങ്ങളുടെ കോശങ്ങളിൽ ആദ്യ ഘട്ടത്തിൽ നിർമ്മിച്ച ബാക്കുലോ വൈറസുകളും, കൊളസ്റ്ററോൾ പോലുള്ള കുറച്ച് രാസ പദാർത്ഥങ്ങളും നിശ്ചിത അളവിൽ ഉപയോഗിച്ചാൽ, ബാക്കുലോ വൈറസ് അവിടെ കൂടുതൽ വളരുന്നു. തൽഫലമായി, ബാക്കുലോ വൈറസിലെ ജനിതകത്തിനനുസരിച്ച് ആ രോഗം ഷഡ്പദ കോശങ്ങളെ ബാധിക്കുകയും, ആ കോശങ്ങൾ കൂട്ടം കൂടി നിൽക്കുന്നു (രോഗാണു ആക്രമിച്ചില്ലെങ്കിൽ ഓരോ കോശവും വേറിട്ട് നിൽക്കും, വൈറസ് ബാധയുണ്ടായാൽ മൂന്നാല്‌ കോശങ്ങളോ അതിലധികമോ ചേർന്ന് നിന്ന് വലിയൊരു കോശങ്ങളുടെ കൂട്ടമായി കാണാൻ സാധിക്കുന്നു). ശേഷം, നമ്മുടെ കയ്യിലുള്ള മരുന്നുകൾ ആ കോശങ്ങളിൽ നിശ്ചിത അളവിൽ ഉപയോഗിച്ച് മാറ്റങ്ങൾ ദർശിക്കാം. മരുന്നിന്റെ ഫലപ്രാപ്തി അനുസരിച്ച് കുറഞ്ഞ അളവിൽ തന്നെ ബാക്കുലോ വൈറസുകൾ അവിടെ വളരാതിരിക്കുന്നു. അതിനാൽ ആ ജനിതകത്തിലെ രോഗം ഷഡ്പദ കോശങ്ങളിൽ ഉണ്ടാവുകയുമില്ല. അങ്ങനെ, കോശങ്ങൾ കൂട്ടം കൂടി നിൽക്കുന്നത് ഒഴിവാകുകയും ചെയ്യുന്നു. ഇതാണ് കോശ സമ്മിശ്ര പരിശോധനയുടെ ഉള്ളടക്കം.

ഞങ്ങൾ ആദ്യം ചെയ്തത്, ചിക്കുൻഗുനിയയുടെ വൈറസുകൾ ഷഡ്പദ കോശങ്ങളിൽ പകർത്തുകയും, പിന്നീട് ഉർസോളിക് ആസിഡ്, ഒലെനോളിക് ആസിഡ് എന്നീ രാസപദാര്‍ത്ഥങ്ങൾ വ്യത്യസ്ത അളവിൽ ഉപയോഗിച്ച് കോശ സമ്മിശ്ര പരിശോധന നടത്തി. അതിൽ ചിക്കുൻഗുനിയക്കെതിരെ ഉർസോളിക് ആസിഡിന്റെ കാര്യപ്രാപ്തി മനസ്സിലാക്കുകയും, ആ രാസപദാര്‍ത്ഥം വിശദമായ പഠനങ്ങൾക്ക് ശേഷം ഭാവിയിൽ ചിക്കുൻഗുനിയ രോഗത്തിനെതിരെ ഉപയോഗിക്കാം എന്നും കണ്ടെത്തി. പിന്നീട്, സസ്യ സ്രോതസ്സിൽ നിന്നും ചിക്കുൻഗുനിയക്കെതിരെ മരുന്നുകൾ കണ്ടെത്താനുള്ള അന്വേഷണത്തിലായി. അവസാനം, ഒരു മലേഷ്യൻ ഗവേഷകൻ ലാബിൽ പരീക്ഷണം നടത്താതെ, കംപ്യൂട്ടറിലെ സോഫ്റ്റ് വെയറുകൾ (ബയോ ഇൻഫൊർമാറ്റിക് ടൂൾസ്) ഉപയോഗിച്ച് ബൈക്കലിൻ (ബൈകാലിൻ) എന്ന പദാർത്ഥത്തിന് ചിക്കുൻഗുനിയക്കെതിരെ പ്രവർത്തിക്കാനുള്ള ശേഷിയുണ്ടെന്ന് പറഞ്ഞതായി കണ്ടു. അങ്ങനെ, സ്‌കൂട്ടല്ലേറിയ ബൈകാലെൻസിസ്‌ എന്ന ചൈനീസ് കുറ്റിച്ചെടിയിൽ നിന്നും ബൈകാലിൻ, ബൈകാലെയ്‌ൻ എന്നീ രണ്ട് സംയുക്തങ്ങൾ സംസ്കരിച്ചെടുത്ത് പരീക്ഷണങ്ങൾ ആരംഭിച്ചു. ആദ്യം ഷഡ്പദങ്ങളുടെ കോശങ്ങളിലും, പിന്നീട് മനുഷ്യ കോശങ്ങളിലും (U-2OS കോശങ്ങൾ) ചിക്കുൻഗുനിയയുടെ ബാക്കുലോ വൈറസുകളെ ഉപയോഗിച്ച് പഠനം നടത്തി. അതായത്, ബാക്കുലോ വൈറസ് സിസ്റ്റത്തിലൂടെ വിവിധ വൈറസ് ബാധക്കെതിരെ മരുന്ന് കണ്ടു പിടിക്കാനുള്ള നൂതന രീതി പരീക്ഷിക്കാൻ ചിക്കുൻഗുനിയ വൈറസിന്റെ ജനിതകമടങ്ങിയ സങ്കരയിനം വൈറസുകളെ ഉപയോഗിച്ചു.

ഷഡ്പദ- മനുഷ്യ കോശങ്ങളിലുള്ള പഠനത്തിൽ ബൈകാലിൻ പദാർത്ഥത്തിന് മാത്രമാണ് ചിക്കുൻഗുനിയക്കെതിരെ പ്രവർത്തിക്കാനുള്ള ശേഷി കണ്ടെത്തിയത്. അതിലുപരി, ബാക്കുലോ വൈറസിലെ ജനിതകത്തിൽ നിന്നും പ്രോട്ടീൻ ഉൽപ്പാദിപ്പിക്കാൻ സഹായിക്കുന്ന രണ്ട് വ്യത്യസ്ത ‘പ്രൊമോട്ടർ’ ഉപഭാഗത്തിന്റെ പ്രാധാന്യത്തെക്കുറിച്ചും മനസ്സിലാക്കാൻ ശ്രമിച്ചു. അതിലുപരി, സസ്തനികളുടെ കോശങ്ങളിൽ വിവിധ വൈറസ് ബാധക്കെതിരെ മരുന്ന് കണ്ടുപിടിക്കാൻ ഈ നൂതന രീതി ഉപയോഗിക്കാം എന്ന അനുമാനത്തിലുമെത്തി. ഇത്രയും ആയപ്പോഴേക്കും വർഷങ്ങൾ കടന്നു പോയി. അതിനിടയിൽ കുറച്ച് കാലം നാട്ടിൽ വന്ന് കൊറോണയിലും പെട്ടു. ഇനി, എലിയിലും മറ്റുമായി കൂടുതൽ പഠനങ്ങൾക്ക് ഇവ വിധേയമാക്കി, എന്തെങ്കിലും പാര്‍ശ്വ ഫലങ്ങളോ മറ്റോ ഉണ്ടാകുന്നുണ്ടോ എന്നതടക്കമുള്ള കാര്യങ്ങൾ പരിശോധിച്ചാൽ മാത്രമേ ബൈകാലിൻ ഉപയോഗം മനുഷ്യരിൽ സാധിക്കുകയുള്ളൂ.. അതിന് ഇനിയും വർഷങ്ങൾ കാത്തിരിക്കണം.

ഓരോ പരീക്ഷണങ്ങളും മൂന്ന് തവണ ചെയ്ത് നോക്കി, പരിണതഫലങ്ങൾ ഉറപ്പു വരുത്തിയതിന് ശേഷമാണ് അടുത്ത ഘട്ടങ്ങളിലേക്ക് പോകുന്നത്. അതിനാൽ, നാം ഇന്ന് കാണുന്ന ഓരോ മരുന്നുകളും നിർമ്മിച്ചെടുക്കാൻ വർഷങ്ങളുടെ പ്രയത്നങ്ങൾ വേണ്ടി വന്നിട്ടുണ്ട്. മുകളിൽ പറഞ്ഞ ഞങ്ങളുടെ ഗവേഷണ ലേഖനത്തിൽ ഇനിയും ശാസ്ത്രീയമായ ഒരുപാട് കാര്യങ്ങൾ ഉൾപ്പെടുത്തുകയും, അവയുടെ പ്രാമാണികമായ തെളിവിന് വേണ്ടി കുറച്ചധികം പരീക്ഷണ-നിരീക്ഷണങ്ങൾ രേഖപ്പെടുത്തിയിട്ടുണ്ട്. അവയൊന്നും ഇവിടെ പറഞ്ഞാൽ ആളുകൾക്ക് മനസ്സിലാകുമെന്ന് തോന്നുന്നില്ല. അതാണ് അവ എഴുതാതിരിക്കുന്നത്.

കൂടുതൽ ഈ വിഷയത്തെക്കുറിച്ചും, ഷഡ്പദ കോശങ്ങളുടേയും മനുഷ്യ കോശങ്ങളുടേയും ആകൃതി, മൈക്രോസ്കോപ്പിലൂടെ കണ്ട വ്യത്യസ്ത നിറങ്ങളിലുള്ള പ്രോട്ടീനുകളുടെ ചിത്രങ്ങളും, ഇതുമായി ബന്ധപ്പെട്ട മറ്റു അറിവുകളുമെല്ലാം ഇന്റർനാഷണൽ ജേർണൽ ഓഫ് മോളിക്കുലാർ സയൻസിന്റെ ഈ ലിങ്കിൽ കാണാവുന്നതാണ്. .

https://www.mdpi.com/1422-0067/22/15/7891

May be an image of Muhammed Muhsin Varikkodan and text
May be an image of Muhammed Muhsin Varikkodan and text
May be an image of Muhammed Muhsin Varikkodan and text that says 'THEJAS NEWS വൈറസ് ബാധയെ പ്രതിരോധിക്കുന്ന മരുന്ന് മലപ്പുറം സ്വദേശി ഉൾപ്പെട്ട ഗവേഷണ സംഘത്തിൻ്റെ കണ്ടെത്തലിന് അംഗീകാരം തേജസ് 25-07-2021'

കീലുങ്ങിലെ പർവ്വതകാഴ്ചകൾ

Tags

, , , , , , ,

ആദ്യ കാലത്ത് ആസ്ട്രൊനേഷ്യൻ ഗോത്ര ജനതയും പിന്നീട് ചൈനീസ്, ജപ്പാനീസ് വംശജരും കുടിയേറിപ്പാർത്തൊരു രാജ്യമാണ് തായ്‌വാൻ. ഏഷ്യയുടെ കിഴക്ക് ഭാഗത്ത്‌ ശാന്ത മഹാ സമുദ്രത്തിൽ സ്ഥിതി ചെയ്യുന്നൊരു കൊച്ചു ദ്വീപ്. ഭൂപ്രകൃതിയനുസരിച്ച് പടിഞ്ഞാറു ഭാഗം താരതമ്യേന സമതലവും കിഴക്ക് ഭാഗത്ത് കൂടുതൽ പർവ്വത നിരകളുമാണ്. ഏകദേശം കേരളത്തിലേതിന് സമാനമായ കാലാവസ്ഥയാണെങ്കിലും ഡിസംബർ മുതൽ ഫെബ്രുവരി വരെയുള്ള മാസങ്ങളിൽ അതിയായ തണുപ്പ് അനുഭവപ്പെടുന്നു. ദ്വീപിലെ നല്ല കാലാവസ്ഥയും ഭൂപ്രകൃതിയുമെല്ലാം വിനോദ സഞ്ചാരികളേയും സന്ദർശകരേയും കൂടുതൽ ആകർഷിക്കുന്നു.

സമുദ്രതീരത്തെ കാഴ്ചകൾ

തായ്‌വാനിന്റെ വടക്കു-കിഴക്ക് ഭാഗത്തുള്ള മനോഹരമായ പർവ്വത പ്രദേശമാണ് കീലുങ്. ഒരേ സമയം ശാന്ത മഹാസമുദ്ര ഭംഗിയും കീലുങ് പർവ്വത നിരകളുടെ കാനന ഭംഗിയും ആസ്വദിക്കാവുന്ന സ്ഥലമാണിത്. തൗയാനിലേയും ഹ്വാലിയാനിലേയും കുന്നുകളേക്കാൾ ചെങ്കുത്തായ രീതിയിലുള്ള കാനന പാതയും, വിശ്രമ കേന്ദ്രങ്ങളുമാണ് ഇവിടുത്തെ പ്രത്യേകത. അതിനാൽ, യുവ ജനതയാണ് കൂടുതലും ഈ പ്രദേശം സന്ദർശിക്കാനും, വ്ലോഗ്- വീഡിയോ ചിത്രീകരണത്തിനും വരുന്നത്. ഇവിടുത്തെ ഇടുങ്ങിയ കാനന പാതകളെല്ലാം വളരെ വൃത്തിയോടെ സൂക്ഷിക്കുന്നു. അതിലുപരി, ഓരോ സഞ്ചാരികളും പരിസ്ഥിതിയെ കൂടുതൽ ബഹുമാനിക്കുകയും, ചപ്പു ചവറുകൾ അലക്ഷ്യമായി വലിച്ചെറിയാതിരിക്കുകയും ചെയ്യുന്നു. സന്ദർശകരുടെ സുരക്ഷയുടെ ഭാഗമായി കാനന പാതയുടെ ഇരു ഭാഗങ്ങളിലും ഇരുമ്പു കമ്പി, ചങ്ങല, കയറുകൾ, സിമന്റ് കട്ട പോലുള്ളവ കൊണ്ട് വേർതിരിച്ചിട്ടുണ്ട്. ചിലയിടങ്ങളിൽ വനത്തിനുള്ളിൽ അരുവികളും കുളങ്ങളും കാണാവുന്നതാണ്. ഇത് പട്ടണങ്ങളിൽ നിന്നും വരുന്ന ആളുകൾക്ക് വേറിട്ടൊരു അനുഭവമാണ്. ഇവക്ക് കുറുകെ തൂക്കു പാലത്തിന് സമാനമായ നടപ്പാതകൾ ഇരുമ്പ് കൊണ്ട് നിർമ്മിച്ചിരിക്കുന്നു. പാലത്തിന്റെ ഇരുഭാഗങ്ങളിലും നമ്മുടെ നാട്ടിലെ പഴയ കാല കോട്ട വാതിലുകളെ അനുസ്മരിപ്പിക്കും വിധം കൽ തൂണുകൾ തലയുയർത്തി നിൽക്കുന്നു. സിമന്റ് കൊണ്ട് വേർതിരിച്ച് വെച്ചിരിക്കുന്ന വഴികളിലൂടെ നടന്ന് നീങ്ങുമ്പോൾ ചെറു കുടിലുകളും, ഏറുമാടങ്ങളും കാണാം. ഇടക്ക്, യാത്രികൾക്ക് വിശ്രമിക്കാൻ ചൈനീസ്-ജപ്പാനീസ് രീതിയിലുള്ള ഇരിപ്പിടങ്ങളും ഒരുക്കിയിട്ടുണ്ട്. വനത്തിനുള്ളിലെ ഓരോ സ്ഥലങ്ങളെക്കുറിച്ചും, പോകേണ്ട ദിശകളുടെ വിവരണങ്ങളുമെല്ലാം ബോർഡുകളിൽ എഴുതി വെച്ചിട്ടുണ്ട്. എങ്കിലും, അവയ്ക്ക് കാനന ഭംഗിക്കനുസൃതമായ നിറങ്ങൾ നൽകി, ചിത്രങ്ങളും കൊത്തുപണികളും ചെയ്തത് ഏറെ മനോഹരമാണ്.

ലവ്വേഴ്‌സ് ലേക് പാർക്ക്

കീലുങ് പർവ്വത നിരകളുടെ താഴെ ഭാഗത്താണ് ലവ്വേഴ്‌സ് ലേക് എന്ന ചെറു തടാകം സ്ഥിതി ചെയ്യുന്നത്. മലമുകളിലേക്ക് കയറാൻ കഴിയാത്ത പ്രായമായവർ, ഗർഭിണികൾ, കൈകുഞ്ഞുങ്ങളുമായി വരുന്നവർ എല്ലാം ഇവിടെ വിശ്രമിക്കുന്നു. തടാകത്തിന് ചുറ്റും വിശാലമായ സമതലങ്ങൾ സിമന്റ് കൊണ്ടും കല്ല് കൊണ്ടും ഒരുക്കിയിട്ടുണ്ട്. ചെറിയ കുട്ടികൾക്ക് സമയം ചിലവൊഴിക്കാനും, ഇവിടെ വരുന്നവർക്ക് ഭക്ഷണം കഴിക്കാനുമെല്ലാം ഈയിടം ഉപയോഗിക്കുന്നു. അതിനിടയിൽ, തടാകത്തിലെ മൽസ്യ സമ്പത്തും ആമകളുടെ സഞ്ചാരങ്ങളുമെല്ലാം കുരുന്നുകളിൽ ഏറെ കൗതുകം നിറക്കുന്നു.

ടൗഉലാൻ- ജോങ്‌സി ല്യോ ഫോർട്ടുകൾ

തായ്‌വാനിന്റെ വൈദേശികാധിപത്യത്തിന്റെയും നിരവധി യുദ്ധ സമാന സാഹചര്യങ്ങളുടേയും ചരിത്രമുറങ്ങുന്ന കടലോരമാണ് കീലുങ്. പതിനാറാം നൂറ്റാണ്ടിന്റെ പകുതിയിൽ ഈ ദ്വീപ് സന്ദർശിച്ച ചില പോർച്ചുഗീസ് നാവികർ ആദ്യമായി ‘ഇൽഹ ഫൊർമോസ’ (മനോഹരമായ ദ്വീപ്) എന്ന് നാമകരണം ചെയ്തു. പിന്നീട് സ്പാനിഷ് ഫൊർമോസ, ഡച്ച് ഫൊർമോസ, റിപ്പബ്ലിക് ഓഫ് ഫൊർമോസ എന്നിങ്ങനെ പലരും വിളിപ്പേരുകൾ നൽകി ചരിത്രത്തിലിടം പിടിച്ചു. ഇവിടെ വന്ന ഓരോ രാജ്യക്കാരും അവരുടെ സുരക്ഷക്കും, ദ്വീപിന്റെ ഭരണ-പട്ടാള നടപടികൾക്കുമായി നിർമ്മിച്ച കെട്ടിടങ്ങളാണ് ടൗഉലാൻ ഫോർട്ടും (Dawulun Fort) ജോങ്‌സി ല്യോ ഫോർട്ടും (Gongzi Liao Fort). പതിനെട്ടാം നൂറ്റാണ്ടിലെ ചൈന-ഫ്രഞ്ച് യുദ്ധ സമയത്താണ് ടൗഉലാൻ ഫോർട്ട് നിർമ്മിക്കുന്നത്. 1840 ലെ ആംഗ്ലോ-ചൈനീസ് യുദ്ധത്തിലും, 1888 ലെ സീനോ-ഫ്രഞ്ച് യുദ്ധത്തിലും പട്ടാളക്കാർ കീലുങ് കടൽക്കരയിലൂടെ ടൗഉലാൻ ഫോർട്ടിൽ വന്ന് തമ്പടിച്ചിട്ടുണ്ട്. പത്തൊമ്പതാം നൂറ്റാണ്ടിൽ ജപ്പാനീസ് വംശജരാണ് പട്ടാളാവശ്യങ്ങൾക്കായി ജോങ്‌സി ല്യോ ഫോർട്ട് നിർമ്മിക്കുന്നത്. തുരങ്കങ്ങളും, ബാരിക്കേഡുകളും, ശത്രുവിനെ നിരീക്ഷിക്കാനുള്ള സ്ഥലങ്ങളും, വിശാലമായ ആയുധപ്പുരകളുമെല്ലാം ഉൾക്കൊള്ളുന്നൊരു കെട്ടിടമാണിത്. കാലാന്തരത്തിൽ ജപ്പാൻ ഇത് ചൈനക്ക് കൈമാറുകയും, ശേഷം തായ്‌വാൻ എന്ന സ്വതന്ത്ര രാജ്യം വന്നപ്പോൾ വിനോദ സഞ്ചാര കേന്ദ്രമാവുകയും ചെയ്തു.

(സുപ്രഭാതം ദിനപത്രത്തിൽ 02/052021 ന് പ്രസിദ്ധീകരിച്ചതാണ്)